طز

طظ فى الثوره 

طظ فى الشهداء
وطظ فيكى يا مصر 

ولا تفرقى معايا بنكله ؟؟
غبى انا لما فكرت انى انزل من بيتى 

علشانك ؟؟؟
كنتى عملتيلى ايه؟؟؟
ولا حتى هتعمليلى ايه؟؟؟
آيه اللى يخلينى احط عمرى على كفى 

واشيل نفسى فوق همومى هم 

يلعن دا يوم اتولدت لقيتك فيه بلدى 

____________________

حلو كده..كويس ..عاجبكوا كده؟؟
طب وضميرى وحبى فعلا ليها اللى بيجرى فى دمى اعمل ايه فيه؟؟؟
 

لازم اسكت لازم اتكتم بحجه الاستقرار 

وهو فين ده ؟؟؟
 

قولوا نعم لتعديل الدستور علشان الاستقرار ؟؟ وماشوفناهوش 

بطلوا مظاهرات واحنا نحاكم الفاسدين ؟؟وماتحكموش 

طب وبعدين يا سياده المجلس العسكرى الموقر ....يا سياده المشير

.....يا آمنا 

...يا حمايتنا 

انتوا معانا ولا معاهم؟؟؟؟

ده اليوم اللى الجيش نزلنا فيه
زغرطنا هللنا
قولنا مين قدنا !!ده الجيش نزلنا يحمينا !وجه اليوم الموعود 

موقعه الجمل؟؟
فجاءه لقينا الجمال والاحصنه
دخله بسهوله زى زفه العرسان
قولنا معلش يمكن ماكنوش عارفين 

انهم بلطجيه ؟؟
الجيش دخل من 11دباباته وسابونا 

اكتر من 6 ساعات بنموت
وقولنا معلش مش عايز يقرب للشعب 

حتى لو بلطجيه علشان هما فى الاول وفى الاخر من الشعب اللى هو بيحميه 

شويه تباطؤ فى اجراءات القبض على الفاسدين وسابوهم يرتبوا ورقهم
واديهم بيطلعوا براءه واحد ورا التانى ؟؟؟
ده البلد اللى مافيهاش اعدام لما قامت فيها ثوره اعدموا رئيسها الفاسد(رومانيا )؟

يا سياده المجلس العسكرى الموقر 

رفقا بشعب شرب المرار سنين وسنين 

شعب الجوع بقى هو زاده
والحرمان هو حياته

يا سياده المشير
انسى صديق الامس 

لانه اصبح ملعون اليوم والغد 

يا حكومه
الشعب خلاص .

حــــــــــــرام 

انا هنزل التحرير تانى
ويمكن ما موتش الاول اموت دلوقتى 

احنا مش هنسكت تانى
كفايه خوف وسكوت 30 سنه 

مابقاش فى اغلى من الضنى نضحى بيه

لا و1000لا مش هسكت
ولا هتكتم انا فعلا بحبك يا مصر
مش عايزه استقرار
مش عايزه الكارت الاخير اللى ليا 

كفايه عليا ربنا احسن مليون مره
من الكارت اللى مكتفنى وذللنى
طظ و ميت مليون طظ فى الاستقرار من غير كرامه 

ولا يوم من ايامك يا منيل !!!!!!!!!!!!!؟

يا جمااااااااااعه الريس اتــنـــــــــحـــــــــــــــــى 

بالكلمه دى بدأت مصر عصر جديد عصر مافيهوش ظلم مافيهوش فساد

انا لسه فاكره لحد انهارده وانا واقفه عند القصر فى العروبه 

وفجأه لقيت صوت زغاريط والناس كلها المصريين كلهم بغض النظر عن الاديان 

بيحضنوا بعض بيحمدوا ربنا على الكابوس اللى انتهى 

احساسى كان لا يوصف انا فاكره انى اعدت اعيط وانا بضحك 

اصحابى افتكرونى اتجننت ,انا نفسى خفت لاكون اتجننت 

والناس كلها جريت على الميدان اللى شهد ثورتنا كانت ليله لا تنسى 

كل ده مجرد مقدمه للموضوع 

الشعب اعد اكتر من اسبوع بيحتفل بتنحى المخلوع 

وبعدين 

دخل الشعب فى ثوره تانيه .... اسقاط الحكومه ,اسقاط الدستور و محاكمه رموز الفساد 

مش ده برضو الموضوع 

 اينعم الرموز كلها ماتحاسبتش بس على الاقل معظمهم اتحبس 

وبيتحاكم  

اينعم حسنى ماتحاكمش بس على الاقل محبوس على ذمه التحقيق فى المستشفى الفخمه اللى فى شرم الشيخ 

اضحك واقولك ان كل ده انا ماقولتش الموضوع 

من غير نرفزه الموضوع يا سيدى هو 

ان كل اللى احنا عملناه ده الثوره ,الشهداء ,المصابين
 

مالوش لزمه !!!!؟ ايوه مالوش لزمه 

اسئلنى ليه؟؟؟

اقولك علشان الحريه اللى نادينا بيها ابتدينا نعملها حبل 

ونلفه على رقبه الثوره 

التغير اللى جرينا علشان نحققه خلناه نار تحرق ثورتنا 

اه والله ما تستغربش 

ومن غير ما تشتمنى هقولك ليه؟؟؟

 قبل الثوره كان فى فتنه بين المسلمين والمسحيين كل سنه تقريبا 

بعد الثوره بقى كل يومين فى فتنه 

بين المسلمين (السلفين) والمسحيين

قبل الثوره كان فى شرطه مطلعه ....اهلنا 

بعد الثوره  بقى فى شرطه بتتفرج على البلطجيه وهى بطلع ...اهلنا 

قبل الثوره كان فى فساد 

بعد الثوره بقى فى تغطيه على الفساد 

قبل الثوره كان فى فقر ومرض وجهل 

بعد الثوره بقى فى جهل وفقر ومصابين 

طبعا انا كده ماقولتش كل حاجه 

واكيد زمانك بتشتم اهلى 

على الاحباط اللى جبتهولك 

بس فى حاجه ..... انا كل الكلام اللى قولته دا 

حقيقه لا مجال للشك فيها 

فى زاويه تانيه محدش فكر يبص للبلد منها 

مصر دلوقتى عامله زى حته الارض التلفانه 

اللى محتاجه جهد كبير قوى علشان ترجع 

جنه زى ما كانت 

الشعب عندوا طاقه انه يتظاهر ويبات فى الشارع ويهتف لحد ما صوته يروح ويستناه يرجع علشان يهتف تانى 

ليه المجهود ده احنا ما نستفدش بيه ؟؟؟؟؟

ليه بدل ما نخرج نقول بالروح بالدم نفديك يا صليب

او

مسلم وافتخر ولو مش عجبك انتحر 

بدل مانروح نحرق ونكسر ؟
وندى فرصه للمندسين انهم يوصلوا للهما عاوزينه 

ونساعدهم على خراب البلد 

منروحش للمؤسسات اللى السرطان المباركى هدمها وبهدلها 

نحاول نعمرها من تانى 

نجرى نزرع الصحراء علشان مواردنا تكفينا ونستغنى عن المعونات 

والاعانات 

ترجع تانى مصر تفيض على العالم 

مش العالم اللى يعطف عليها بكام مليار كل سنه 

الشباب اللى فاضى اتعبوا وفكروا فى مشاريع 

تبنى البلد من جديد 

الرجاله الكبار اللى يقدر يمول مشروع 

لاى شاب يساعد بيه بلده ما يبخلش 

انا عارفه ان زمانك بتقول عليا خيالى واسع 

وان مافيش حد ممكن يقتنع بكلامى 

بس الاصرار اللى انا شفته فى عيون الناس اللى كانت فى الميدان 

يخلى مصر الاولى على العالم فى كل حاجه 

يا جماعه احنا طول عمرنا واحد ماتخلوش حاجه تفرق بينا 

لا كامليا ولا عبير 

ولا الجن الازرق 

يقدر يقلل من قدر الاسلام او المسيحيه 

ياريت نفوق بدل ما نودى البلد لطريق يحرقها 

ويحرقنا معاها 

ماتخلوش العالم بعد ما شهد لنا بالاصرار 

والعزيمه و الشجاعه 

يتريق علينا ويقول اننا شويه جهله 

عملنا ثوره علشان نهدم بلدنا 

ماتخلوش بتوع احنا اسفين يا ريس

وفلول النظام البائد 

ينتصروا علينا ...ماتخلوش حد يقول 

ولا يوم من ايامك يا منيل ......بس

الخنازير والكلاب

الحاج احمد و المقدس جرجس عاشوا طول عمرهم فى قريه واحده اتربوا مع بعض من وهما صغيريين. وكانوا وهما شباب لما حد يجى 

عليهم  او على حد فيهم ياخدوا حقهم منه. اتجوزا هما الاتنين وعاشوا جنب بعض فى القريه اللى اتولدوا فيها  وخلفوا كتير وكان ساعات بيحصل بينهم 

مشاكل بس عمرها ما طولت عن ساعه ودايما بتعدى من غير ما حد من العيلتين يشيل فى قلبه حاجه من التانى وفى يوم من الايام كان 

فيه مجموعه من الكلاب جت على القريه وبقت  تهوهو طول الليل وكان بيضايق منها الحاج احمد والمقدس جرجس وكانوا دايما يضربوها بس للاسف 

بترجع تانى وتهوهو اكتر فى كل مره.  وفى ليله  كان فى مشاكل او بمعنى اصح  قلق بسيط بين العيلتين  كان فى شويه خنازير اعده 

تتمشى راحه جايه فى القريه وفجاءه قامت الكلاب مهوهوه جاااااااااااااااااااااااااااااامد 

الخنازير خافت فجريت  والكلاب جريت وراها لحد ماوصلوا بين اليبت بتاع الحاج احمد والمقدس جرجس وفجاه كسروا الباب بتاع 

المقدس جرجس  لما حاول الكلب انه يهاجم الخنزير. ولما طلع الصبح جه ابن المقدس جرجس شاف الباب مكسور راح كسر باب البيت 

بتاع الحاج احمد افتكر ان ولاد الحاج احمد هما اللى عملوا كده . ولما شاف ابن الحاج احمد الحال  راح رايح عند بيت جرجس واعد 

يزعق طلع ولاد جرجس واتخنقوا معاه فخرجوا 

اخوات الشاب وولاد احمد. وحصلت مشكله كبيره قوووو ى بينهم وخسروا سنين عمرهم والايام الحلوه واجمل لحظات عمرهم اللى 

عاشوها مع بعض

 وفجاءه ............

خرج المقدس والحاج وكل واحد اخد اولاده جوه بيته وحلف للتانى انه يصلحلوا الباب اللى اتكسر 

وبضحكه كبيره حضن الحاج المقدس وقاله: ماينفعش ننسى اجمل ايام حايتنا اللى عشناها مع بعض 

  و نخلى شويه كلاب وخنازير ينسونا اننا مصريين 

ومحدش يسالنى هما عرفوا ازاى ان الكلاب والخنازير هما اللى عملوا كده ؟
علشان دى مش محتاجه سؤال ؟؟؟؟؟؟؟؟؟؟؟؟

وبس..كده