من 22 سنه لما فتحت عينى على الدنيا لقيت فيها ثوابت ما اتحكمتش فى وجودها
اولها دينى
تانيها امى وحنيتها وابويا وقسوته
تالتها مصر بلدى اللى بدوب فى ترابها
رابعها لقيت اهلى بيكرهوا اليهود فكرهتهم
خامسها بقى رئيس بلدى (السابق)الحمد لله
انا بطبعى بحب التغير . بس فى حاجات فى حياتنا ماينفعش نغيرها زى دينا وبلدنا وابونا وامنا .....ورئيسنا
بس رئيسنا دى ما استمرتش كتير
بقالى فى مصر 20 سنه وانا عارفه ان ده بابا ودى ماما و حسنى الرئيس
انا ظروفى كانت الحمد لله ميسره جدا...يعنى لا اتولد جعانه ولا مريضه والحمد لله اهلى علمونى احسن تعليم
يعنى لابكره النظام علشان محرومه ولا علشان مريضه ومش قادره اتعالج
انا اتولد لأب ناصرى وام ساداتيه
واهلى كانوا بيشربونى القراءه مع اللبن
قريت فى السياسه بدرى قوى
قريت كتب عن السادات وعن عبد الناصر كتب مصريه وحتى اجنبيه
وبما انى معاصره مبارك فامحتاجتش انى اقرا عنه كتير
بس الغريب انى لاقيت اننا لوكرهنا او حبينا عبد الناصر منقدرش ننساله السد العالى وتاميم القناه
والمصانع الكتيره اللى عملها (واللى بعها المخلوع)وحاجات كتير
واننا لو حبينا او كرهنا انور السادات مانقدرش ننساله حرب اكتوبر المجيده وثوره التصحيح والسلام اللى
رجعلنا ارضنا كامله من غير نقطه دم واحده
ومبارك سواء كرهناه او كرهناه !؟ فهو عمل
توشكى .....وبعها
شويه كبارى ومدن جديده ....ومئات الحوادث اسبوعيا
ومترو الانفاق
قدام ايه؟؟؟؟؟؟؟؟؟؟؟؟؟؟
بيع معظم مصانع القطاع العام وتسريح الكفائات عماله زايده
مليون مواطن تحت خط الفقر 40
مدن كتير فى الصعيد معندهاش كهرباء ولا صرف صحى ولا غاز
والغاز بيتصدر لاسرائيل بنص التمن
ناس بتبيع اعضائها علشان تعيش واحنا بنصدر القمح والارز لاسرائيل باقل من نص التمن
10 الاف طفل بيجلهم سرطان سنويا بسبب المبيدات المسرطنه اللى انت اتسترت على الوزير اللى جابها
نبقى فى بلد النيل والالاف الاطفال بيجلهم فشل كلوى بسبب المياه الملوثه
ده غير مئات حالات التعذيب والوفاه بسبب الشرطه سنويا
وملايين الشباب اللى مش لاقيه شغل وبالتالى زادت نسبه الانتحار
ماحدش ذل الشعب زيك كده ولا حتى اليهود
30سنه من الظلم ....القهر ....الفساد .....مرض.....فقر....والجهل
ابتديت اتخنق زى حال كل الشباب عايزين نتكلم وخايفين لانتحبس ونتعذب ونموت
وكان لازم نحرر نفسنا من اللعنه المباركيه اللى حلت على البلد
وحصلت المعجزه ....اللى دفع تمنها مئات الشباب بدمهم وساعتها اتأكدت ان مهما طال الليل لازم هيجى نهار
من بعديه وان الظلم لازم تكون اخرته سودا على الظالم
الحمد لله ان الشعب المصرى ضرب مثال للعالم كله كيف تكون الثوره السلميه ؟؟؟؟ وذات نتائج ملموسه
ويارب الثوره تكمل على خير ومصر ترجع تانى ام الدنيا
No comments:
Post a Comment